Pari namatay sud sa Pension House

CEBU, Philippines - Usa ka pari ang napalgang patay sulod sa usa ka lawak sa usa ka pension house sa dalan V. Gullas sa barangay Sto. Niño sa miaging gabii.

Usa ka ‘Al Villa’ ang nakarehistro sa record book sa Pacific Tourist Inn diin kini miistar apan nasayran nga si Rev. Fr. Alexander Silvano Villamor Salve, 52, diay kini nga pari sa Sto. Tomas de Villanueva Parish Church sa barangay Pardo ning dakbayan.

Base sa impormasyong nakutlo sa kapolisan, ang gwardiyang si Virgilio Sevilleta sa maong establisamento gikatahong giduol sa duha ka mga wala mailhing babaye ug gipahibalong adunay gi-atake sa room 426.

Tungod niini daling gisusi sa mga kawani sa pension house ang maong lawak diha sa ikaupat nga andana ug nakit-ang abli ang maong lawak ug dunay lalaking wala na maglihok hinungdan nga gipahibalo nila kini sa front desk.

Sa report sa DyLA, ang gwardiya mitug-an nga sa iyang pag-abot wala nay pantalon si Salve samtang ang ubos nga bahin sa iyang lawas gitabunan og habol ibabaw sa kama.

Si Jona Bejarasco ang front desk officer mitawag sa Emergency Rescue Unit Foundation (ERUF) apan pag-abot niini sa Perpetual Soccour Hospital gideklarar kining patay na.

Ang patay’ng lawas gidala ngadto sa St. Peter Funeral Homes ug diha na mailhing pari diay kini pinaagi sa iyang bayaw nga babaye.

Nasuta usab base sa death certificate niini nga Myocardial Infarction, Post Coronary Bypass ug Coronary Artery Disease ang gikamatyan niini.

Si Cebu City Police Director Patrocinio Comendador mibutyag nga base sa pasiunang imbestigasyon sa Homicide Section natural ang kamatayon niini ug walay foul play.

Midugang si Comendador gipapangita na nila ang duha ka babayeng maoy mipahibalo sa gwardiya aron maklaro unsay nahitabo.

Si Msgr. Achilles Dakay, ang liaison officer sa Simbahan sa Sugbu nagkanayon nga mga ‘huhungihong’ ra ang pagduda sa mga tawo nganong naabot ang pari sa maong hotel ug ang giingong aduna kini kaubang babaye.

“Mga hungihong ra man na sa mga tawo kung nganong naabot dinha ang pari. Dili ta dayon mo-jump into conclusion. Tagsa-tagsaon lang nato aron atong masayran unsay tinuod,” matud pang Dakay.

Sumala pang Dakay nga kinahanglang makit-an ang giingong mga babayeng mipahibalo sa gwardiya aron mahibaw-an ang tinuuray nga nahitabo, samtang gisalig na usab niya ang imbestigasyon ngadto sa kapolisan.

Sa laing bahin, ang presidente sa Pardo Parish Pastoral Council nga si Exor Cabiluna mitug-an nga gikan nag-‘blessing’ sa barangay Tisa si Salve ug mi-adto sa department store sa North Reclamation Area uban ang iyang assistant nga ginganlan lang og Takloy ug Mimi.

Sa dihang nahuman og pangaon ang tulo sa mall gikatahong gipapauli ang duha sa pari tungod kay giingong naikog kini sa mga kauban tungod kay aduna pa kini laing lakton.

Ang mga batan-ong nakaila kang Salve dili makatuo sa report nga may kaubang babaye sulod sa hotel ang ilang gitahod nga pari.

Si Kristine Pol, presidente sa Parish Youth Coordinating Council mihulagway nga seryosong pari ug maayong tawo ang pagkaila nila kang Salve. – BANAT NEWS