CEBU, Philippines - Patay ang usa ka lalaki samtang nagpahayahay sa terasa sa pinuy-anan niini sa bukirang bahin sa barangay Apo lungsod sa Argao niadtong Martes sa alas 7:00 sa gabii.
Ang biktima mao si Eduardo Solatorio, 27, samtang padayon giila sa kapolisan ang mamumuno niini.
Matud ni SPO2 Ramuel Banugon sa Argao Police dihang nahinabi sa Banat News naglingkod ang biktima dihang kalit nga gipusil sa wala mailhing lalaki.
Ang kapuyo sa biktima nga si Ritchel Alcarez, 22, nga nagpailis og sinina sa ilang duha ka mga anak nakadungog sa buto ug siyagit sa biktima nga nagpakitabang.
Gikatahong nagpasalba pa kaduha ang mamumuno hinungdan nga walay nakagawas sa mga igsoon ug silingan sa biktima, dihang nilinaw na una pa nila maduoli ang biktima apan patay na kini ug may samad pinusilan ubos sa iyang tiyan ug walang bahin sa paa.
Ang kapulisan padayun pa sa paggukod sa mamumuno ug gitutukan karon sa imbestigasyon ang report nga gidudahang kawatan ang biktima sa maong dapit. – BANAT NEWS