CEBU, Philippines - Usa ka trabahante sa construction ang gidunggab sa iyang katrabaho sa milabay’ng gabii diha sa sitio Anapog, barangay Dumlog dakbayan sa Toledo.
Ang biktima nailang si Nestor Carbon Monforte, 52, lumad nga taga Taplan, syudad sa Barrio, Koronadal Cotabato apan kasamtangang nagpuyo sa maong dapit.
Samtang ang suspetsado nailhan nga si J.R Pantalunan, 28, taga Calumpit, Bulacan ug kasamtangan usab nga nagpuyo sa nahisgutang barangay.
Gikatahong naglakaw ang biktima uban sa iyang higala nga si Helen Gako Moral, 32 gikan sa barangay Sangi ug padulong na unta mopauli sa gipuy-ang barracks dihang kalit mibutho ang suspek ug gidunggab ang biktima sa tuong dughan.
Gidala sa Toledo City Hospital si Monforte apan gideklarar kining dead on arrival.
Matud pa ni PO2 Roel Suquid sa Toledo City Police Station wala pa nila masuta ang motibo. Ang suspetsado kasamtangang natanggong sa Toledo City Police Station. – BANAT NEWS