Kanhi polis nakaipsot sa raid

CEBU, Philippines - Nakaipsot ang kanhi polis nga gidudahang armado ug tigpayuhot og ginadiling drogas samtang nadakpan ang iyang amahan atol sa ronda nga gipahigayon kagahapon sa buntag didto sa barangay Antipolo sa lungsod sa Medellin.

Si Sr. Supt. Erson Digal, hepe sa kapolisan sa lalawigan nga nahinabi sa Banat News miila sa kanhi polis nga nakaeskapo nga si Ruby Jess Cabucos. Samtang ang amahan niining nadakpan giilang si Geller Cabucos.

Si Digal mitug-an nga sa miaging semana nakadawat siya og report gikan sa usa ka concerned citizen nga nagtug-an kaniyang ang amahan ug anak giingong armado ug maoy tigpayuhot og ginadiling drogas sa maong lugar.

Si Digal mimando sa hepe sa Medellin Police Station, Sr. Insp. Bonifacio Arresgado nga panid-an ang duha ug nakumpirmar kini hinungdan nga mikuha sila og search warrant sa korte.

Inabagan sa Special Reaction Unit (SRU) ug Regional Mobile Group sa Bogo gironda sa kapolisan ang panimalay ni Cabucos apan nakaeskapo ang kanhi polis ug nakuha sa panimalay sa duha ang unom ka paketeng may sulod nga gidudahang shabu, unom ka bala sa .45 ug P900. Nakuha usab sa balay sa amahan ang usa ka .38 rebolber, upat ka pakete sa gidudahang shabu, 27 ka tin foils ug P940 nga gituohang halin sa shabu.

Ang duha naa sa watchlist sa lungsod, si Ruby Jess Cabucos kanhi sakop sa RMG-7 sa Sibonga apan na-dismiss kini. – BANAT NEWS