CEBU, Philippines - Samaron ang usa ka konduktor sa usa ka jeep pasaheroan human kini lubaa sa duha ka batan-on didto sa sitio Fatima, Salvador Extension, barangay Labangon, dakbayan sa Sugbo sa miaging gabii.
Ang biktima mao si Jimmy Abadingo, 21, nga taga barangay Tisa, ug usa ka konduktor sa PUJ, samtang ang mga suspetsado nailhan lang sa ngalang Boy ug Romy, pulos nag-edad og 17 ug 14 anyos, nga taga Salvador Extension.
Sumala sa kapolisan nga natulog ang biktima sulod sa jeep nga iyang gikonduktoran dihang kalit nga mitungha ang duha ka suspetsado nga pulos lasbag.
Unya hilom nga giduslak sa ilang kutsilyo ang liog, bukton, ug kilid sa biktima nga maoy nakapamata kaniya.
Nakabangon og dali ang biktima ug nakadagan kini ug nailhan niya ang mga suspetsado.
Ang biktima daling gihatod ngadto sa Cebu City Medical Center, samtang ang mga suspetsado gipangita pa karon sa kapolisan human kini manibat. – BANAT NEWS