Lalaking nakadunggab sa nanguyab sa iyang ig-agaw nasikop

CEBU, Philippines - Gidakop sa kapolisan sa Presinto 5 sa Opao Police Station, ang usa ka tawo kinsa nakadunggab sa usa ka batan-ong lalaki didto sa sitio Ilog, barangay Opao, dakbayan sa Mandaue sa miaging kaadlawon.

Ang suspetsado mao si Retchie Ponce, 34, ulitawo, kinsa suspetsadong miluba kang Jerome Boyonel, 20 , ulitawo, nga silingan niini.

Si Inspector Wilson Abot, deputy chief sa Presinto 5 sa Opao Police Station nga nahinabi sa Banat News mitug-an nga gikatagbo sa biktima ang suspetsado ug gibadlong nga dili manguyab sa 14 anyos nga dalagita nga iyang (biktima) ig-agaw.

Apan nasuko ang suspetsado ug mihiwasa kini hangtod nga nagkalalis ang duha.

Dihang naupsan na sa pailob ang suspetsado, milanit kini sa iyang kutsilyo ug gihansak ngadto sa tiyan sa biktima.

Ang biktima kinsa kaantigo usab nga molihay-lihay wala gyud masabak, apan nagisi ang kilid niini dihang natapsingan sa nagsinaw-sinaw sa kahait nga kutsilyo sa suspetsado.

Ang biktima gihatod dayon ngadto sa Mandaue City Hospital samtang ang suspetsado gibalhog usab dayon sa   detention cell. – BANAT NEWS