Nagkaon Panihapon gipusil sa balay

CEBU, Philippines - Usa ka tawo gipusil samtang nanihapon uban sa iyang pamilya sulod sa ilang balay sa lungsod sa Boljoon sa miaging gabii.

Si Fernando Niere, 32, ulitawo nga taga South Granada, Boljoon, Sugbo nakaangkon og daghang samad pinusilan sa iyang lawas.

Ang biktima nagtuo nga gipusil siya sa usa sa iyang bayaw nga si Gilbert Cinco, 23, nga silingan ra usab niya sa maong barangay.

Gidala si Niere sa Vicente Sotto Memorial Medical Center gikan sa Boljoon Municipal Hospital.

Gidapit sa kapolisan sa Boljoon si Cinco aron patubagon sa pasangil nga siya’y nagpusil kang Niere. Hinuon, wala’y nakakita sa maong pagpamusil kay nag-blackout sa tibuok Boljoon sa dihang nahitabo ang insidente.

Nagpreparar usab ang mga polis sa ipahigayon nga paraffin test kang Cinco.

Dugang pa ni SPO4 Cristino Oraka, imbestigador sa Boljoon Police Station, daghang nadawat ang kapolisan sa Boljoon Police Station nga si Niere na-blotter na kini sa ilang estasyon sa makadaghang higayon.

Gani ang iyang kaugalingong amahan midangop usab sa Boljoon Police Station niadtong milabay’ng adlaw ug mireklamo kay hilabihan nga pagkapalahubog sa iyang anak ug init kaayo og ulo kun mahubog. – BANAT NEWS