CEBU, Philippines - Usa ka patay’ng lawas sa wala hiilhing lalaki napalgan nga nagbuy-od didto sa dalan Mangubat, barangay Poblacion, dakbayan sa Lapulapu sa miaging kaadlawon.
Ang maong patay’ng lawas hingkod na sa panuigon may dakong samad sa ulo nga agi sa gipuspos nga bato, ug may agi pa sa dinunggaban sa dughan nga gituohang maoy nakaingon sa iyang kamatayon.
Si PO1 Gamallel Averilla sa kapolisan sa maong dakbayan nga nahinabi sa Banat News miingon nga kasarangan lamang ang gidak-on sa panglawas sa maong tawo, nagsul-ob og t-shirt nga gimarkahan og Power Metal, puti ang pamanit ug may gitas-ong lima ka tiil ug duha ka pulgada ang pamarog niini.
Matud pa ni PO1 Averilla nga usa ka Carl Cejas nga nagpuyo sa nahisgotang dapit maoy unang nakakita sa maong patay’ng lawas nga naghay-ad sa daplin sa karsada nga naligo sa kaugalingon niyang dugo.
Dugang pa niya nga ang mga molupyo sa maong dapit wala usab makamatikod nga adunay naglalis o nag-away sa maong lugar nianang sayong gabii.
Gipaabot karon sa kapolisan nga may mga tagtungod nga moila sa maong biktima.