CEBU, Philippines - Nagmalaumon ang Public Attorneys Office (PAO) ug ang mga forensic team nga makakuha og 30 hangtod 40 ka patay’ng lawas sa mga biktima sa nalunod nga MV Princess of the Stars niadtong Hunyo 2008.
Si Percida Acosta, hepe sa PAO mibutyag nga bisan wala pa sila makakuha og kopya sa mando sa korte ug sa mga rekord gikan ni National Bureau of Investigation medico-legal officer Renato Bautista, ilang gisugdan ang pagpang-ugkat sa mga patay’ng lawas.
Apan bisan pa man sa pagsugod sa PAO, ila gihapong gipaabot ang mga rekord sa mga nangamatay nga gihuptan ni Bautista.
“Kailangan talaga siyang mag-comply kahit gumagawa na kami,” pasabot pa ni Acosta.
Samtang ang direktor sa forensic team sa PAO nga si Dr. Erwin Erfe mibutyag nga mopahigayon sila og anthropological examination sa mga bukog sa patay’ng lawas nga ilang naugkat aron masayran ang mga timailhan sa usa ka tawo.
Human nila madeterminar ang description sa patay’ng lawas ila dayong ipahibalo sa katawhan ilabi na sa mga tagtungod pinaagi sa pagbutang niini sa website sa PAO.
Dugang pa ni Erfe nga ila kining masayran dili mominos sulod sa upat ka bulan apan nagmalaumon gihapon sila nga madali kini.
Samtang ang usa sa mga tagtungod nga si Geraldine Payawal, 46, molupyo sa siyudad sa Mandaue nanglugmaw pa ang luha nga miingon sa Banat News nga malaumon gihapon siya nga buhi pa ang iyang bana hangtod dili kini niya makit-ang patay.
Dugang pa ni Payawal nga wala usab siya masayod kun unsa ang iyang reaksyon kun ugaling iyang masayran nga dugay nang patay iyang bana.
Nasayran nga ang iyang bana nga si Rafael Payawal, 47, usa ka welder sa Manila ug mi-text pa kaniya nga magpasugat sa pier apan mao na lay iyang nasayran nga nalunod na diay ang barko nga gisakyan niini.
Kahinumduman nga niadtong Hunyo 20, 2008 nautingkay ang katawhan human nila masayri nga ang MV Princess of the Stars nasangad atol sa bagyong Frank ug gatosan ka mga tawo ang nahanaw nga hangtod karon pipila pa ka mga tagtungod ang nagmalaumon nga buhi pa ang ilang mahal sa kinabuhi. – BANAT NEWS