Nag-shopping gamit ang fake credit card sikop

CEBU, Philippines - Upat ka tindahan sa duha ka dagkong mall ang nabiktima sa pagpangilad sa usa ka babayeng migamit og peke nga credit cards pagbayad sa iyang gipamalit nga mga gamit.

Si Abryan Tala Rodriguez, 28, lumad nga taga Project 4, Quezon city ang nagtingkagol karun sa Mabolo Police Station human kini nasikop sa gwardiya sa SM Mall. Samtang ang mga tindahan nga gisudlan ni Rodriguez mao ang Recreational Outdoor Exchange kon ROX, DC Boutique, nga nahimutang sa Ayala Mall samtang ang The Travel Club ug Nike Stadium nahimutang usab sa SM Mall.

Base sa giluwat nga affidavit sa Regional Trial Court sa mga kahera nga sila Cheryl Tambolero, Gregg Reynes, Evelyn Ruelo ug Janet Dapiton nga ang akusado namalit og pipilaka butang sa Ayala Mall ug SM Mall gamit ang Citibank Visa Card ubos sa pangalan sa usa ka Maria Rosario V. Gayares.

Nasayran nga niadtong Marso 30 karung tuiga si Rodriguez mipalit sa mga gamit susama sa upat ka tsinelas, duha ka trolleys, usa ka padlock, lima ka paresan nga sapatos ug duha ka t-shirt nga nagkantidad tanan og P13,570.

Matud pa reklamo ni sa mga reklamante nga ilang nabantayan nga sa diha nga pirmahan na ni Rodriguez ang resibo magdali-dali kining mogawas sa establisamento ug mao nalay ilang nabantayan nga ang card number ug ang number sa resibo adunay kalahi-an.

Tungod sa maong panghitabo daling mitaho ang mga kahera sa ilang labaw ug sa diha nga mibalik si Rodriguez sa usa sa mga tindahan nianang pagkasunod adlaw gisikop kini sa mga gwardiya ug gihatod sa Mabolo Police Station.

Kasong kalapasan sa Republic Act 8484 kon law on credit card offenses ang gipasaka sa Regional Trial Court ug bugti sa iyang temporaryong kagawasan girekomendar kining mopiyansa og P20 mil. – BANAT NEWS