Car washer giluba namatay

CEBU, Philippines - Namatay ang usa ka car washer human kini lubaa sa iyang kontra didto sa Great Day Carwash Center (GDCC) sa dakbayan sa Talisay niadtong Biyernes sa kaadlawon.

Ang biktima nailhan lang sa ngalang Junjun, trabahante sa GDCC, samtang ang suspetsado mao si Andro Trania, 19, lumad nga taga sitio Nabutuhan, barangay Quezon, dakbayan sa San Carlos, Negros Occidental.

Sumala sa imbistigasyon sa kapolisan, nasayran sa Banat News gikan kang PO3 Alfredo Cuizon, PO2 Epifanio Comendito Jr., ug PO1 Jundave David sa Talisay Police Station nga ang biktima ug ang suspetsado nagsinumbagay niadtong Huwebes sa hapon.

Ang biktima nga maayo og pangamot, mikulata ug mibun-og pag-ayo sa suspetsado hinungdan nga puwerting bun-oga sa naulahi.

Nianang pagkakaadlawon sa adlaw'ng Biyernes, ang suspetsado nga nagdumot sa biktima, nagpaniid samtang nahinanok sa pagkatulog ang naulahi sa counter sa iyang trabahoan, ug gihansakan sa kutsilyo ang tiyan niini.

Gidala dayon sa iyang mga kauban sa trabaho ang biktima ngadto sa Cebu City Medical Center sa dakbayan sa Sugbo, apan pag-abot didto gideklarar kining patay na. (BANATNEWS)