Namunal og bata gitabanga'g luba

CEBU, Philippines - Gitabangan og dunggab sa duha ka lalaki ang usa ka 38-anyos nga lalaki human pasanginling namunal og kahoy sa 9-anyos nga bata sa miaging gabii diha sa Katipunan Street, sa barangay Tisa ning dakbayan.

Ang biktima nakaangkon og daghang samad dinunggaban sa kalawasan giila sa taga Homicide Section sa Cebu City Police Office mao si Constantino Bantilles, nga taga Buhisan ning dakbayan.

Samtang ang gitumbok nga mga suspetsado mao sila si Isido Labaya, 18, taga Sacred Heart barangay Cogon-Pardo ug Roel Corbo, 36, molupyo usab sa maong lugar.

Subay sa imbestigasyon sa kapolisan naglingkod daplin sa dalan ang biktima dihang kalit gisukmatan nganong gibunalan niini og kahoy ang batiis sa 9-anyos nga anak ni Bantilles.

Diha nagsugod ilang panaglalis tungod kay miinsister ang biktima nga iyang gibadlong ang bata nga dili magdula sa karsada apan wala mopatuo, tungod niini nasuko ang mga suspek ug gitabangan og luba ang biktima.

Ang mga suspek nadakpan hinuon ni PO2 Edcel Petecio nga sakop sa Special Weapons and Tactics kinsa naagi niadtong higayona ug gi-turnover ngadto sa Punta Princesa Police Station.   (Rey Pasaporte)