CEBU, Philippines - Mga nuog nga gibasa sa thinner, gibugkos ug gisalibay duol sa gate 7 sa Philippine Export Processing Zone (PEZA) sa barangay Pusok, dakbayan sa Lapulapu sa miaging gabii, nakapaalarma sa kapolisan kay nasaypan kining bomba.
Si PO1 Maximo Villagonzalo sa kapolisan sa maong dakbayan miingon nga human nila madawat ang taho sa guwardiya sa PEZA bahin sa gituohan niyang bomba, ila dayong gitawgan ang bomb explosive unit sa Philippine Air Force (PAF) sa Mactan aron pagsuta sa maong taho.
Apan dihang ilang gihiling ang maong putos, mga nuog diay nga gituyo sa pagbasa sa thinner ug gilabay duol sa gate hinungdan nga nanimaho kining thinner.
Ang guwardiyang babaye sa maong gate nga gibati og kalisang nanawag dayon og polis sa pagtuo nga bomba ang sulod sa maong putos.
Nagtuo si PO1 Villagonzalo nga mga estambay sa maong lugar maoy naghimo sa maong binuang sa hinungdan nga wala hisayri. – BANAT NEWS