Paggamit sa government vehicles sa kampanya gipanid-an tungod sa mga reklamo

CEBU, Philippines - Ang Department of Interior and Local Government kon DILG-7 mipasidaan ngadto sa mga incumbent officials nga mokandidato karong piniliay nga dili gamiton ang sakyanan sa gobiyerno sa ilang mga pangampanya.

 Sumala pa ni DILG-7 legal officer Danilo Almendras nga ang mga kandidatong masakpang mogamit sa mga sakyanan sa gobiyerno sa maong katuyoan mahimong makasuhan og kasong kriminal ug administratiba.

Kun mapamatud-ang sad-an mahimo silang mataktak sa ilang serbisyo ug makasuhan usab og kasong kriminal.

Matud pa ni Almendras nga daghan na silang nadawat nga mga reklamo pinaagi sa estorya lang nga dunay mga incumbent officials ang mikandidato karon ang nakit-ang migamit sa mga sakyanan sa gobiyerno sa ilang pangampanya.

Ang mga reklamo gikatahong sagad nagagikan sa mga kontra sa maong mga gireklamong politiko, sagad sa mga sakyanang gigamit mao ang mga multicabs ug ubang mga sakyanan sa gobiyerno sa pagtambong sa pagpangampanya sa mga kandidatong nagpapili sa national nga posisyon.

Si Almendras nagkanayon nga andam silang modawat og pormal nga reklamo gikan sa concerned citizens ug uban pang interesadong moreklamo ug mipasalig nga ilang tinud-on ang bahad ngadto sa hintungdang lokal nga mga opisyal.

Lakip sa nadawat nga reklamo mao ang pagbabag sa mga kapitan nga makapamilit og campaign posters sa common poster areas ang mga kandidato sa mga kaatbang sa ilang gisuportahang kandidato. (Chester Abadilla)    (BANATNEWS)