Presidentiables nanghatag kuwarta ni Cardinal Vidal

CEBU, Philippines - Giangkon ni Arsobispo Ricardo Cardinal Vidal nga halos tanang mga kandidato pagka-presidente miduol kaniya ug mihatag og kuwarta.

Matud pa ni Cardinal Vidal atol sa paglusad sa “Vote God Initiative,” ang kampanya sa Simbahang Katoliko paggiya sa mga botante pagpili og kandidato, nga ang bugtong wala miduol kaniya nga kandidato sa pagka-presidente mao si Ang Kapatiran presidential candidate John Carlos “JC” delos Reyes.

Si Vidal wala hinuon mitug-an sa mga sakop sa media kun pila ang kantidad nga gipadala ngadto sa iyang buhatan sa mga kandidato pagka-presidente.

Apan iyang gitataw nga iya kining gibalibaran bisan pa man og alang kini sa programa sa Artsidyosesis sa Sugbo nga nagtabang sa mga tawo.

Matud pa ni Vidal nga dili siya makabalibad sa pagduol sa maong mga kandidato kay mangayo man kini og bendisyon kaniya apan iya lamang gireklamohan kay mosulti man dayon kini nga iyang gi-endosar.

Nagtuo ang Arsobispo nga ang maong kuwarta alang sa pagkuha og pabor nga botos sa mga Katoliko hinungdan nga iya kining gibalibaran.

Kini tungod kay buot niyang ipreserbar ang iyang dugay nang baruganan nga “non-partisans.”

“Otherwise, I will loss my privilege of poll watching," matud ni Vidal. Matud pa sa Cardinal nga dili usab siya buot nga mabahinbahin ang mga tawo sa simbahan ug mipasabot, “If I declare or favor any candidate I will create enemies.”

Samtang ang Overall Coordinating Steward sa Vote God Nationwide Church Campaign Fr. Carmelo Diola miingon nga ang kampanya sa simbahan wala magpabor og kandidato.

Apan iyang gitataw nga ilang tudloan ang mga botanteng Katoliko sa pagpili og “God fearing candidates” aron makasiguro ang katawhan nga mausab ang dagan sa gobyerno karon ug maluwas na gikan sa korupsiyon. – BANAT NEWS