Gituohang hilabtanon gipatay
CEBU, Philippines - Namatay diha-diha ang usa ka ulitawo human kini pusila sa wala hiilhing lalaki didto sa sitio Balogo, Captain Claudio, syudad sa Toledo sa miaging gabii.
Ang biktima mao si Junrel Sadora, 18, taga Balogo samtang ang mamumuno wala pa hiilhi hangtod karon.
Sa pakighinabi sa Banat News ni PO3 Roel Tadique, kini mibutyag nga ang biktima nagkalingaw og tan-aw og telebisyon sa balay sa ilang silingan.
Sa dihang mipauli na kini sa ilang balay, giatangan kini sa kriminal ug giluthang.
Si Anastacia, nga inahan sa biktima kinsa nakadungog og buto sa armas maoy misusi sa lugar nga gigikanan sa buto ug mao nalay misugat sa iyang panan-aw ang iyang anak nga naglunang na sa kaugalingong dugo nga wala nay kinabuhi.
Si Tadique nagtuo nga ang biktima nga nasabak sa tiyan sa usa ka bala malagmit biktima sa paregla kay base sa pamahayag sa inahan, walay kontra ang biktima.
Apan may nabati usab nga mga estorya ang kapolisan nga matud pa may pagka- hilabtanon ang biktima, hinungdan nga nagduda usab sila nga ang pagkahilabtanon niini maoy hinungdan nga gipusil kini.
Hinuon padayon pang giimbistigar sa kapolisan ang maong hitabo. - Lesley Caminade (BANAT NEWS)
- Latest
- Trending
