CPDRC bisitahon sa Comelec

CEBU, Philippines - Usa ka voters education ang ipahigayon sa Commission on Elections sulod sa mga nagkadaiyang bilanggoan sa dili pa ang presidential ug local elections karong bulan sa Mayo.

 Sumala pa ni Provincial Election Supervisor Atty. Lionel Marco Castillano usa sa ilang bisitahon ang Cebu Provincial Detention and Rehabilitation kon CPDRC sa barangay Kalunasan ning siyudad sa Sugbu.

 Apan giklaro ni Castillano nga kinahanglang masuta una kun moabot sa 200 ka mga piniriso ang nakaparehistro alang sa poll automated election karong Mayo 10 ning tuig 2010.

 Matud pa ni Castillano nga sa pagkakaron ang ilang buhatan nakig-coordinate na sa mga opisyales sa Bureau of Jail Management and Penology kon BJMP alang sa maong kalihukan.

 Giklaro ni Castillano nga kun dili makaabot og 200 ka mga botanteng mga piniriso mahimong mga jail warden na ang ilang tugahan aron maoy motudlo sa mga pinirisong makabotar gamit ang Precinct Count Optical Scan kon PCOS machines. Sa milabay’ng semana, si Comelec Commissioner Rene Sarmiento mibutyag nga dunay 23,657 sa 54,866 kwalipikadong binilanggo gikan sa 414 ka bilanggoan sa nasud ang tugutan nilang makabotar.

Matud pa ni Sarmiento ang mga kwalipikadong detainees naglangkob niadtong ang mga kaso padayon pang gihusay sa korte, kadtong kasamtangang nagserbisyo sa ilang mga sentensya nga dili moabot usa ka tuig ug kadtong mga nakombikto na apan dunay pending nga appeal sa korte.

Ang maong lakang maoy naghimo sa Pilipinas nga ikaupat nga nasud sa tibuok kalibutan nga nagtugot sa mga binilanggo nga makabotar sunod sa Australia, Great Britain ug Canada.

Atol sa eleksyon, dunay special Board of Election Inspectors (BEI) nga mobutang og polling center sa mga bilanggoan nga dunay kapin 100 ka detainees diin sila moboto. 

Ang BEIs na maoy modala sa mga balota sa detainees sa Precinct Count Optical Scan (PCOS) machines kuyog ang mga sakop sa poll watchers ug Philippine National Police.

Kadtong mga bilanggoang di moabot og 100 ang inmates kuyogan ngadto sa ilang mga voting precincts aron makabotar apan kinahanglan mo-file una sila og petisyon sa korte alang sa maong katuyoan. - Edwin Ian Melecio ug Chester Abadilla (BANAT NEWS)