Lalaki gi-salvage nakit-an

CEBU, Philippines - Napalgang patay sa kalibunan ug dunay mga samad pinusilan sa lawas ang usa ka lalaking suspek sa pagpamusil sa uyoan ug pag-umangkon diha sa sitio Mangga barangay Malolos lungsod sa Barili kagahapon sa alas 5:00 sa buntag.

Ang napalgang wala nay kinabuhi mao si Richard Carabuena, 34, molupyo sa barangay Taloot, Barili.

Matud pa ni SPO2 Zaldy Morillo sa Barili Police dihang nahinabi sa Banat News ang biktima maoy suspek sa pagpamusil nila ni Buenaventura Briones Cabaluna, 44, ug pag-umangkon niining si Vicente Villarin, 24, sa nahisgutang lugar sa milabay'ng gabii.

Subay sa inisyal nga imbestigasyon sa kapulisan ang biktima gipasanginlang maoy mipusil ni Buenaventura alas 8:45 sa milabay'ng gabii dihang gisulong ni Carabuena ang pinuy-anan sa duha ug miresulta sa panaglalis ug pagpamusil.

Si Buenaventura ug Villarin pulos nakaangkon og samad pinusilan sa ilang kalawasan ug nalandig sa Carcar District Hospital samtang daling nisibat si Carabuena ug wala na maabti sa mirespondeng mga polis.

Apan kagahapon sa alas 5:00 sa buntag nakit-an nalang si Carabuena sa kalibunan daplin sa dalan nga nagbuy-od na ug wala nay kinabuhi ug dunay samad pinusilan sa walang bahin sa lawas.

Nagtuo ang kapulisan nga gi-salvage kini ug gipanimaslan sa iyang mga kontra sanglit gihulagway kining badlungon sa maong lugar ug dunay standing warrant apan wala pa matumbok kun unsang kasoha niini. (BANATNEWS)