CEBU, Philippines - Giklaro sa mga opisyales sa AFP Central Command nga wala silay gipaburan nga kandidato sa pagka-presidente sa umaabot nga election.
Sumala pa sa tigpamaba sa AFP Central Command nga si Major Wilson Feria nga bisan pa man og kanhi Defense Secretary ang administration candidate nga si Lakas-Kampi-CMD standard bearer Gilbert Teodoro apan dili kini makakuha og solid votes gikan sa mga sundalo dinhi sa Central Visayas.
Matud pa ni Maj. Feria ang mga sundalo karon may nagkadaiyang basehanan sa ilang pagpili sa pagka-presidente.
Iya usab nga gisalikway ang pagduda nga ang mga sundalo sa tibuok nasud gimandoan sa pagbotar ngadto sa mga kandidato sa administrasyon aron masiguro ang kadaugan nga gipaluyohan ni Presidente Gloria Macapagal Arroyo.
Dugang pa niini nga ang mga opisyal sa armadong kusog sa nasud wala nagpugos sa ilang mga ginsakpan nga botohan gyud ang mga kandidato sa administrasyon. - Chester Abadilla (BANAT NEWS)