CEBU, Philippines - Ang kontrobersiyal nga polis sa Pardo Police Station nga nag-atubang og kaso tungod sa pagsulay og patay ug nadestino na sa Operation Section sa Cebu City Police Office, gireklamo na usab og pagpanghulga.
Nagpa-blotter sa Pardo Police Station ang usa ka Eduardo Lopez, 59, lumad nga taga Highway-Tagunol, Cogon-Pardo ning siyudad sa Sugbo.
Sumala pa ni Lopez nga niadtong Biyernes, Pebrero 26 ning tuiga gipatawag siya sa barangay hall alang sa usa ka reklamo ni SPO4 Sanrico Jolejole may kalambigitan sa petisyon nga gipirmahan sa mga residente sa dalan F. Tabura, barangay Pardo sa petisyon nga nagpabalhin sa naasoy’ng polis tungod sa giingong pagpang-harass niini.
Sumala pa ni Lopez nga mga pasado alas 8 sa gabii niadtong Biyernes nagsugod ang hearing sa barangay nga gipasiugdahan sa Lupon Tagapamayapa nga si Teresita Rabor uban ni Konsehal William Tajanlangit ug gitambongan usab ni SPO4 Jolejole.
Sumala pa ni Lopez nga gipangutana siya kun nganong mipirma kini sa petisyon nga nagpabalhin kaniya og destino ug iya kining gitubag nga mipirma siya sa petisyon tungod kay kini maoy gitumbok nga mipatay sa iyang anak nga si Richard Lopez, 18, nga usa ka traysikad driver, ug sa usa ka Vincent Amancio, 20, usa ka tig-ayo og payong ug taga-Pardo niadtong Mayo 4, 2006.
Si Lopez mialegar nga si SPO4 Jolejole mitubag kaniya og "(pag)tarong diha ha, pusilon tika unya.." dungan ang pagkupot ug paghata og hulbot sa iyang armas nga giluklok sa iyang hawak.
Si SPO4 Jolejole hinuon maoy unang nakapa-blotter sa Pardo Police Station niadtong Sabado tungod sa giingong malisyosong gipamahayag ni Lopez ug ni Madronio Sabellano, ang amahan sa gipusil sa naasoy nga polis niadtong Enero 11, 2009 nga si Reynaldo Sabellano.
Makatulo ka higayon nga gitawagan sa Banat News si SPO4 Jolejole sa Operation Section sa CCPO aron pagkuha sa iyang habig apan matud pa ni PO3 Efren Fuentes nga bisan sa oras nga duty unta si SPO4 Jolejole, wala kini sa ilang buhatan gikan sa buntag hangtod sa hapon kay may gitambungan kini nga hearing sa korte. (BANATNEWS)