Tindera'g isda nakuhaa'g P200 mil shabu

CEBU, Philippines - Gidakop sa miaging gabii ang usa ka inahan human giingong maoy nangunay pagtahan sa gibana-banang P200 mil nga kantidad sa gituuhang shabu ngadto sa mga polis nga mopahigayon unta og paniksik sa ilang balay pinasikad sa search warrant.

Ang mga sakop sa Investigative and Detective Management Branch pinanguluhan ni Sr. Insp. George Ylanan sa sitio Lawis barangay Pasil dala sa search warrant nga gipirmahan ni Judge Silvestre Maamo Jr. sa RTC-7 Branch 17 batok sa magtiayong Robeth ug Cathy delos Santos tungod sa pasangil nga pagpamaligya og shabu. Si Cathy delos Santos, 26, nga tindera og isda mao ray naabtan sa mga polis dihang giadto ang ilang panimalay sanglit giingong nakaikyas ang bana niini.

Sumala pa ni Ylanan nga dihang naabot sila sa balay ug gipahibalo ang kabahin sa search warrant, walay pagsupak ang ginang ug mao pay nangunay pagpangita sa gitagoang shabu ug gitunol ngadto sa mga polis.

Ang maong shabu gilangkuban sa lima ka dagkong pakete ug usa ka medium pack nga gikuha niini sa usa sa mga karsones diha sa ilang kwarto, sumala pang Ylanan gibana-banang nagkantidad kini og P200 mil sa street value.

Apan bisan paman niini gipadayon sa kapolisan ang pagsiksik sa panimalay ug wala nay laing nakuhang ebidensya.

Matud pa ni Delos Santos nga nahinabi sa mga tigbalita kagahapon dugay na silang nagbuwag ug siya ra usab ang nagtagad sa ilang duha ka anak nga nagpangidaron og 7-anyos ug 6-anyos.

Nagdumili usab sa pagtubag si delos Santos sa pangutana sa mga tigbalita kun nganong misulod siya sa maong kalihukan ug si kinsa ang nagsuplay kaniya. Matud pa ni Ylanan nga wala pa mabahig-bahig ang maong drugas.

Kasong paglapas sa Republic Act 9165 o paghupot og illegal nga drugas ang ipasaka ni Delos Santos samtang ang iyang bana ila na usab nga gipangita. (BANATNEWS)