'Whistleblower' misaway sa Hunta, mihagit sa Ombudsman

CEBU, Philippines - Gihagit ni whistle blower Crisologo Saavedra ang Ombudsman ug uban pang hingtungdang ahensya sa gobiyerno nga ipadayon ang imbestigasyon kabahin sa kontrobersyal nga Balili lot.

Si Saavedra nga kaniadto maoy mipabuhagay sa kahiwian sa pagpalit sa kontrobersyal usab nga lampposts, mibutyag nga andam siya pagsaksi sa   imbestigasyon sa kontrobersyal nga pagpalit sa Kapitolyo sa Balili property nga ang dakong bahin naglubog sa tubig diha sa Tinaan siyudad sa Naga.

Si Saavedra misaway sa mga sakop sa Hunta Probinsyal tungod sa pagbabag niini aron depensahan si Gob. Gwendolyn Garcia dihang giduso ni Bise Gob. Gregorio Sanchez ang pagpadayon sa wala mahumang imbestigasyon sa Balili controversy atol sa gipahigayung sesyon niadtong Lunes.

Gibutyag ni Saavedra atol sa interview sa DyDD nga lig-on ang iyang ebidensyang makapamatuod nga dunay P35 milyones nga nabulsa sa maong transaksyon tungod kay iyang nahinabi mismo ang kapikas ni Luis Balili nga si Amparo Balili ang tag-iya sa maong luna.

Si Amparo sumala pang Saavedra nga P65 milyones lang ang ilang nadawat nga bayad gikan sa sobra sa P98 milyones nga gipagawas nga pundo sa Kapitolyo. Nunot niini gihagit ni Saavedra ang Ombudsman pagtiwas sa pending nga imbestigasyon ingon man si Garcia pagtiwas usab sa linaing imbestigasyon sa Kapitolyo aron maestablisar ang kamatuoran sa dakung kurapsyong nahitabu sa maong transaksiyon.

Natahap usab si Saavedra nga dunay ubang mga opisyal sa Kapitolyo ang apil sa nakadawat og bahin sa na- ‘missing’ nga P35 milyones hinungdan nga gipugong-pugongan ang pagtiwas sa imbestigasyon aron kapanalipdan ang pagbulgar sa kamatuoran. 

Si Saavedra maoy usa sa ni-expose sa Balili controversy nga gihulagway niya nga usa sa labing dako nga kurapsyon dinhi sa Sugbo. (Darrel Carumba)   (BANATNEWS)