Kandidatong tikasan i-firing squad

CEBU, Philippines - Misugyot kagahapon si Congressman Benhur Salimbangon nga ipa-firing squad ang politikong masakpan nga manikas panahon sa election.

Ang pinutong nga sugyot gihimo ni Salimbangon gumikan matud pa niya sa grabeng tikas nga iyang nasinatian sa iyang distrito sa miaging piniliay nga gani hangtod karon nagpabilin ang baho niini.

Miingon siya nga dili lamang paglapas sa kasagrado sa boto sa usa ka botante ang nahimong krimen sa usa ka kandidatong tikasan kundi pagpanikas kini sa tibuok katawhang Pilipino.

Gumikan sa kabug-at niining maong sala, si Salimbangon nagkanayon nga mas maayo pang ilawog sa firing squad ang usa ka kandidatong tikasan aron maimpas ang tanan ug dili na makapanikas pag-usab.

Hinuon wala siya maghunahuna nga himoong balaod kining iyang sugyot kay bunga lamang kini sa nag-alintabo niyang kapungot ug kalagot batok sa mga kandidatong tikasan.

Wala usab siya'y gihinganlang kandidato, ang iya lang nga kun kinsa naigo niini angayang maghinulsol ug magbasol ug magbag-o na sa hunahuna ug biyaan na ang panikas. Apan sa usa ka forum kagahapon si Salimbangon miingon nga angayang usbon ang balaod sa election sa nasud pinaagi sa pagpalungtad lang og 60 ka adlaw nga masulbad ang unsa mang mga protesta bahin sa election.

 Kini aron dili mapurhisyo ang   pagserbisyo sa usa ka piniling opisyal sama sa nahitabo sa ika-upat nga distrito sa lalawigan sa Sugbo nga naglakip sa lungsod sa Daan Bantayan diin gideklara nga may laing palingkuron sa katungdanan bisan taliabot na ang election.

 Matud pa ni Salimbangon nga mopanday unya siya og balaodnon nga mag-short cut sa proseso sa pag-atiman sa election protest pinaagi sa pag-ila sa COMELEC nga maoy katapusan nga modisisyon ug dili na mahimong iapelar pa ang disisyon niini gawas lamang kun may pag-abuso sa posisyon ug sa pagpakanaug sa desisyon.

 Gipasabot ni Salimbangon nga makalolooy kaayo ang mga kabus nga kandidato sanglit magkinahanglan pa man kini og dakong kwarta aron makasang-at o kaha makatubag sa apelasyon ngadto sa COMELEC en banc ug hangtod na sa Korte Suprema.

 Samtang si Cebu City South district Election Officer Atty. Edwin Cadungog misuporta usab sa tinguha ni Salimbangon nga sulbahon ang election protest sulod sa labing dugay 60 ka adlaw human sa election.

 Apan iyang gitataw nga mas maayo nga may election court nga himuon ug wala nay lain pang kaso nga dunggon gawas lamang sa mga election protest.

 Kini tungod kay kun isagol kini sa general court mulanat pa og pipila ka tuig una pa masulbad ang maong kaso tungod kay kausa lang sa matag semana kini paminawa. – BANAT NEWS