Tulisang napusilan sa agtang namatay sulod sa tambalanan

CEBU, Philippines - Namatay kagahapon sa alas-11 sa buntag diha sa tambalanan ang suspetsadong tulisan kinsa gipusil sa agtang sa wala mailhing tawo human giingong nanulis sa mga pasahero sa jeepney uban sa iyang igsuon niadtong Huwebes sa kaadlawon diha sa tulay sa Mananga, barangay Tabunok, dakbayan sa Talisay.

Ang namatay diha sa tambalanan mao si Michael Baguio, 21, residente sa nahisgutang barangay.

Kahinumduman nga si Michael uban sa manghod niining si Joseph giingong mitulis nila ni Ronelyn Cuervo, 28 ug Blanche Navales apan sa ilang pagkanaog kalit nga may wala mailhing tawong mipusil kang Michael.

Na-recover sa mga polis gikan sa magsuong Baguio ang mga personal nga butang nila ni Cuervo ug Navales.

Si Supt. Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga ang polis nga ubos sa Field Training Program (FTP) nga gipabantay ngadto sa Vicente Sotto Memorial Medical Center (VSMMC) diin gi-admit si Michael maoy mitaho kaniyang namatay si Michael nianang pagka-alas 11:00 sa buntag.

Dihang gidala si Michael ngadto sa nahisgutang tambalanan kritikal na ang kahimtang niini tungod sa iyang samad pinusilan sa agtang.

Si Joseph nagtingkagol sa Talisay City detention cell ug maoy mag-atubang sa kasong robbery hold-up nga gipasaka ni Cuervo ug Navales batok kaniya ug sa iyang maguwang niadtong Huwebes diha sa Talisay City Prosecutor’s Office.

Si PO1 Jundave David kinsa usa sa mga imbestigador sa maong hitabo mibutyag kagahapon sa Banat News nga base sa ilang nahipos nga report sa wala pa ang insidente sa pagpanulis ang magsuong Baguio nalambigit na og rambol sa mga gang diha sa barangay Lagtang.

Ang magsuong Baguio gituohang mga sakop og gang apan si Joseph ang mihimakak niini sumala pa sa mga imbestigador.  – BANAT NEWS