CEBU, Philippines - Patay dihadiha ang usa ka amahan human pusila sa hinigugma sa iyang anak nga miyembro sa Bloods Gang pasado alas 10 sa miaging gabii sa Upper Manol sa barangay Tisa.
Ang namatay nailhan nga si Richard Niez, 42, residente sa maong lugar samtang ang suspetsado nailhan nga sila si Joaquin “Waray” Cornejo, uyab sa anak sa biktima ug maoy gitumbok nga maoy mipatay kang Niez. Lakip sa gitumbok nga suspek mao sila si Glenn De Guzman,19, nga usa ka tindero ug mga kaubang si Jonas Flores alyas Jonas Bardinas nga pulos sakop sa Bloods Gang.
Sa imbestigasyon sa kapolisan nasayran nga ang biktima nangita sa iyang 14-anyos nga anak nga babayeng miyembro usab sa maong gang aron kini papaulion.
Sa dihang iya nang nakit-an ang iyang anak nga nagpundo duol sa usa ka payag kauban ang mga suspek gikomprontase niini ang mga suspetsado nga miresulta sa ilang pagtinubagay.
Apan imbes nga mokalma ang mga suspetsado tungod sa pagbadlong kanila sa biktima ila na hinuon kining gitabangan og kulata apan wala pa gyud matagbaw usa kanila nga may dalang armas mipusil sa biktima makadaghang higayon.
Ang biktima nga nakaangkon og upat ka samad pinusilan sa nagkadaiyang parte sa iyang lawas namatay diha dayon.
Samtang ang mga suspetsado daling nangikyas human sa hitabo apan nasikop ra usab si De Guzman sa hot pursuit operation diha sa Cebu City Medical Center kinsa giingong naigo sa saag nga bala diha sa tuong paa, positibo kining giila sa anak sa biktima nga usa sa mipasipala sa iyang amahan.
Si SPO4 Alex Dacua nagkanayon nga ang amahan nangita sa iyang anak aron malikay sa gisudlang grupo ug gipahimangnoan atubangan sa mga kaubang gang members gipasidan-an kining dili pa kini angayang manguyab tungod kay bata pa apan gikasuko kini ni Cornejo nga miresulta sa pagpangulata ug pagpamusil.
Kagahapon pasado alas-6 sa buntag boluntaryong mitahan si Cornejo ngadto sa tanod nga si Boy Borres sa barangay Kamagayan.
Gipangita pa karon si Flores kinsa padayong nagtago-tago samtang giandam na ang kasong murder nga ipasaka batok nilang tulo. – BANAT NEWS