Kanhi NBI asset gisukmag sa langyaw

CEBU, Philippines - Usa ka Amerikano ang gitanggong sa kapolisan human kini manumbag sa giingong usa ka kanhi NBI asset diha sa casino sa dakong hotel sa barangay Lahug kagahapon sa kaadlawon.

Si Steeve Henning, 62, kasamtangan nga nagpuyo sa Southhills Subdivision sa barangay Tisa gipasanginlang misumbag kang Joey Cal nga taga barangay Punta Princesa ning dakbayan nga nagduwa usab sulod sa maong casino.

Base sa imbestigasyon sa kapolisan gipasanginlan ni Cal si Henning nga misukmag kaniya hinungdan sa iyang pagkatumba, giingong sa wala pa mahitabo ang pagpanukmag nagkalalis pa ang duha. Nasundan kini sa kagubot tali sa duha hinungdan nga mipatunga ang mga security personnel sa casino ug gidala sila sa Mabolo police station.

Sa pakighinabi sa Banat News kang Henning kini mipasangil nga nagduwa sila og poker ug nagkainitay sila ni Cal maong migawas nalang siya apan gisundan siya niini hangtud sa ganghaan.

Sumala pa niini nga samtang siya nagpalayo gisundan siya ni Cal nga nagpunay og yawyaw ug pagpanghudlat maong miduol siya sa mga gwardiya aron magpatabang apan wala siya tagda sa mga gwardiya.

 “I needed to watch my back, his threatening me,” pasabot pa ni Henning.

Dihang wala siya tabangi sa mga gwardiya nangayo siya og tabang sa ubang tawo apan kalit siyang gisukmag ni Cal sa likod hinungdan nga midepensa siya sa iyang kaugalingon.

Sumala pang Henning nga hubog si Cal niadtong tungora apan siya mihimakak nga hubog siya niadtong tungura, samtang kini mipadayag nga andam niyang atubangon ang kiha tungod kay siya usa lamang ka bisita dinhi sa nasud.

Si Cal maoy usa sa mga nakasuhan nga nalambigit sa napalpak nga Plantation Bay operation nga diin nangaangol ang mga kawani sa maong hotel dihang gipangrakrakan sa mga giingong ahente sa NBI sa pagtuong sila mga sakop sa usa ka sindikatong ilang gi-target. Kasong physical injuries ug alarm scandal maoy gikatakdang ipasaka batok sa maong langyaw.   (Lesley Caminade)    (BANATNEWS)