CEBU, Philippines - Naiban-ibanan na karon ang mga tulisan sa barangay Tabunok, dakbayan sa Talisay human masikop ang duha niini niadtong Biyernes ug gani gitakda nga pasakaan og kiha karong adlawa sa usa sa ilang nabiktima nga ilang gibalian og bukton.
Ang nagkagulkol na karon sa prisohan sa kapolisan sa Talisay mao sila si Sonny Alcantara, 25 nga taga sitio Mananga, Tabunok, ug Sidney Duat, 18, nga taga barangay Pardo, dakbayan sa Sugbo.
Ang duha nasikop nila ni PO3 Mikie Espina ug Stephen Sefuesca sa Talisay Police Station sa akto nga nagbitbit og kutsilyo nga gituohan nilang gamiton sa pagpanulis sa mga pasahero sa sakyanang molabay sa Tabunok paingon sa habagatan.
Gisuspetsahan nila ni Espina nga si Alcantara ug Duat nga pipila kini sa mga tigpanulis sa mga pasahero nga magsakay og jeepney kay usa sa mga biktima nila mitumbok sa ilang mga dagway, ug gani mao kini ang mopasaka og kiha kanila karong adlawa.
Siya mao si Grace Mae Maandig, 32, nga taga barangay Bacay, lungsod sa Minglanilla kinsa gidapit sa kapolisan pagpasil-ing sa dagway nila ni Alcantara ug Duat.
Pagkakita ni Maandig sa duha, nagpangagot ang bag-ang sa biktima sa kapungot kay nasuta niya ang duha nga maoy nakapainutil sa iyang kamot karon human labniha sa duha ka suspetsado ang iyang cell phone nga iyang gikuptan niadtong Enero 28, 2010 sa alas 9:30 ang takna sa gabii.
Matud pa sa biktima nga nagsakay siya og jeep gikan sa dakbayan sa Sugbo paingon sa Minglanilla dihang pag-abot sa Mananga kalit nga gibunlot ni Alcantara ug Duat ang iyang cell phone nga nagkantidad og P5 mil, ug tungod kay nabali ang iyang bukton, nabuhian niya kini.
Gibutyag ni Maandig nga mikapin na sa P100 mil ang nagasto sa iyang bukton sa iyang pagpahospital didto sa South General Hospital sa dakbayan sa Naga. – BANAT NEWS