Magtiayon gibanhigan, bana patay, mrs. luwas

CEBU, Philippines - Patay diha-diha dayun ang bana samtang nasalbar sa iyang backpack ang asawa niini human kalit gipamusil samtang naglakaw uban sa panon sa mga kabanay ug silingan nga nagtungas sa bukid niadtong Huwebes sa gabii diha sa sitio Guingcamote, barangay Captain Claudio syudad sa Toledo.

Si Condrado Abanto Tante, 34, molupyo sa nahisgutang lugar ang namatay diha-diha dayon gumikan sa samad pinusilan sa likod samtang ang iyang asawa nga si Narcisa giingong gipusil usab apan wala makadulot ang bala diha sa backpack niini.

Si Jovenal Jimenez, radio operator sa Toledo Police station mibutyag sa Banat News nga nagpas-an ang namatay sa usa ka sakong bugas patungas ngadto sa ilang pinuy-an uban ang mga silingan ug kabanay gikan nangompra dihang nahitabo ang pagpamusil.

Sumala pa sa imbestigasyon nga kalit lang nga may wala mailhing tawong mikalit og pamusil sa magtiayon ug maayong pagkaigo sa likod sa namatay, ang asawa nga diha ra usab sa duol niini giapil usab og pusil apan giingong wala makadulot ang bala ug nipilit lang ang slug diha sa backpack niini.

Nagtuo ang kapolisan nga posibleng naalaan ra ang mga biktima sanglit walay nakabingkil ang magtiayon sa maong dapit, apan wala nila isalikway ang posibilidad nga may nagdumot sa duha.   (Lesley Caminade) (BANATNEWS)