Natagak sa motorsiklo dalagita naligsan tipi

CEBU, Philippines - Namatay ang usa ka 16-anyos nga dalagita human kini malagpot gikan sa gisakyang motorsiklo taliwala sa kalsada ug aksidenteng naligsan sa nagsunod nga bus pasahero-an sa national highway sa barangay East Poblacion siyudad sa Naga niadtong Huwebes sa alas 5:30 sa buntag.

Ang namatay mao si Mary-ann Largo, 16, molupyo sa barangay Inuburan, Naga nga miangkas sa motorsiklong gimaneho ni Edward Ubas, nga molupyo sa barangay Nailad.

Samtang ang drayber sa Ceres bus nga dunay plakang FWH-423 mao si Wilfredo Aloro, taga Looc Martilyo, La Libertad Negros Oriental kinsa mitahan sa iyang kaugalingon ngadto sa kapolisan human sa aksidente.

Matud pa ni Dondon Ubas, radio operator sa Naga City Police dihang nahinabi sa Banat News subay sa spot report nga gibasehan niini ang motorsiklong gimaneho ni Ubas mi-overtake sa gisundang traysikol apan aksidenteng nasabod ug nawad-an og control sa manobela ang drayber.

Ang pagbaliwliw sa motorsiklo nakaingon sa pagkalagpot sa biktima gikan sa luyo ni Ubas ug natagak sa dalan.

Naatol usab nga maoy pag-agi sa bus ug naapekehan na og brake hinungdan nga nalatayan gyud ang biktima sa ligid niini samtang naangol usab ang drayber sa motorsiklo human malamba ang motor niini.

Daling gidala sa Vicente Sotto Memorial Medical Center (VSMMC) ang dalagita nga biktima apan tungod sa kagrabe sa kadaut nga nahiaguman sa kalawasan nabugtoan gyud kini sa kinabuhi. –  BANAT NEWS