CEBU, Philippines - Patay dihadiha ang usa ka negosyante og uling human gisulong ug gipusil makatulo ka higayon samtang nagsulod sa sako sa mga uling diha sa gawas nga bahin sa iyang pinuy-anan sa barangay Kahumayan, siyudad sa Danao, niadtong Miyerkules sa alas 7 sa gabii.
Ang biktima nga patay dihadiha mao si Jose Elmer Tito, 39, molupyo sa sitio Siyete, barangay Kahumayan, Danao. Samtang ang mamumuno wala pa mailhi sa paghimo ning balita.
Matud ni SPO4 Edgar Gomez sa Danao City Police Station nga ang biktima gidiretso og pusil sa wala mailhing mamumuno ug nakaangkon og duha ka samad pinusilan sa tuong dughan ug paa.
Sa pag-abot sa mirespondi nga mga polis nagbuy-od nang wala nay kinabuhi ang biktima.
Ang kapulisan padayon sa ilang hot pursuit operation pagsikop ug pag-ila sa suspek ug personal nga kasungian ang gitutukan nga motibo sa nagpadayong imbestigasyon sa kapulisan. - Darrel Carumba (BANAT NEWS)