Turista midagsang sa Sugbu

CEBU, Philippines - Gibutyag ni Senior Adviser Phineas Alburo sa Department of Tourism (DOT)-7 nga mas daghan na ang mga turistang miabot dinhi sa nasud ilabina sa Sugbo sa unang kuwarter karung tuiga kun itandi sa milabay’ng tuig.

Kini sa dihang nasuta sa mga langyaw nga mituyhakaw na usab ang ekonomiya sa nasud human kini mosukarap sa miaging tuig.

Gani nagkanayon si Alburo nga kasagaran sa mga turistang langyaw nga misuroy dinhi sa nasud sayo niining tuiga mao ang mga Koreano, Hapon , Insek, Ruso ug uban pa.

Si Alburo midugang nga niadtong milabay’ng Sinulog sa buwan sa Enero halos napuno-puno ang tanang hotel dinhi sa Sugbo gumikan sa kadaghang langyaw nga turista nga miduaw nganhi.

Dinhi sa Sugbo adunay 14 mil ka lawak sa hotel ug mga resort, samtang laing 556 ka lawak sa spa nga pulos ukopado sa mga langyaw ug lokal nga turista.

Matud ni Alburo nga karong buwana nag-anam-anam na usab pagsaka ang gidaghanon sa mga nangabot nga mga langyaw’ng turista dinhi sa Sugbo, ug hangtod na kini sa maghinapos ang tuig. - Rey Pasaporte (BANAT NEWS)