CEBU, Philippines - Usa ka miyembro sa gang ang giunay og dunggab sa iya rang kauban samtang laing miyembro usab sa gang ang napusilan sa karibal nga gang sa managlahing mga dapit dinhi sa dakbayan niadtong milabay'ng gabii.
Giunay og dunggab ang biktimang 17-anyos nga usa ka altar boy ug residente sa barangay Guadalupe sa kaubang minor usab nga nagtingkagol na sa Guadalupe Police Station, ang duha pulos sakop sa Bloods Gang.
Sumala pa sa imbestigasyon sa kapolisan ang biktima ug hinigugma gikan misimba sa Guadalupe Church atol sa Valentine's day ug padulong na mamauli dihang kalit nga gibabagan sa suspek ug walay daghang pangutana kalit gihansakan sa dughan ang biktima.
Bisan og samaran nakahigayon pa og ilog sa kutsilyo sa suspek ang biktima dayong dagan paingon sa ilang balay ug gidunol ngadto sa iyang amahan ang kutsilyo.
Ang amahan daling misusi sa nahitaboan dili layo sa ilang balay sa J. Labra Street ug diha niini maabti ang suspek ug nadakpan dayong turnover niini ngadto kang SPO1 Teodoro Lumanas ang desk officer sa Guadalupe.
Nagduda ang kapolisan nga posibleng nagselos ang suspek ngadto sa biktima apan gisusi pa usab ang laing anggulo sa motibo niini.
Samtang naangol usab ang usa ka 17-anyos nga vendor nga giingong sakop gihapon sa Bloods Gang human pusila sa miyembro sa karibal nga Crips Gang niadtong Domingo sa hapon diha sa sitio Kalinaw sa barangay Carreta ning dakbayan.
Ang 17-anyos nga biktima residente sa maong dapit samtang usa ka nailhan lang sa pangalang ‘Marjun’ kuyog ang duha ka wala mailhing kauban niini nga pulos sakop sa pikas grupo maoy gitumbok nga mipusil sa biktima.
Ang biktima mitug-an sa imbestigador sa Homicide section sa CCPO ngadto kang PO2 Geoffrey Gutual nga samtang siya nagbantay sa paninda iyang nakit-an ang suspek nga nagdala nang daan og armas uban sa laing duha ka kauban paingon kaniya hinungdan nga mikaratil siya og dagan.
Apan bisan paman niini, gipusil gihapon siya sa suspek nga nakaingon sa pagkasamad sa iyang dapi-dapi. Ang mga gikatahapan daling mipahilayo usab sa lugar.
Ang biktima gihatud ngadto sa Cebu City Medical Center. (BANATNEWS)