Drayber sa gunman pagpatay sa traffic enforcer nadakpan sa kapolisan

CEBU, Philippines - Nasikop ang usa sa gidudahang suspek sa pagpusil patay sa traffic enforcer sa Talisay sa gihimong hot pursuit operation diha sa barangay Inayagan, lungsod sa Minglanilla niadtong Biyernes sa gabii.

Ang nasikop mao si Joalcher Bartido, 30, residente sa nahisgutang lugar nga sumala pang Supt. Henry Biñas, hepe sa Talisay City Police Station, maoy gitumbok sa saksi nga maoy nagmaneho sa motorsiklong gisakyan sa gunman nga mipatay kang Roel Capala niadtong Huwebes sa gabii diha sa dalan Sangi, barangay Tabunok.

Matud pa ni Biñas sa Banat News nga si Bartido usa ka drayber og multicab nga may rotang Naga-Punta ug nianang pagkahapon niadtong Huwebes gidakop kini ni Capala ug giisyuhan og “reckless driving” ticket.

Duna kini multang kapin sa P1,000 hinungdan sa ilang panaglalis, giingong mibahad si Bartido kang Capala nga mobalik apan wala kini panumbalinga sa biktima.

Si Biñas nagkanayon nga sa ilang pagsubay sa kopya sa Temporary Operator’s Permit (TOP) ni Capala, tulo ka drayber ang nakumpiskahan niini og lisensya niadtong Huwebes sa wala pa mahitabo ang pagpatay.

Usa sa tulo mao si Bartido kansang lisensya wala pa matugyan ni Capala ngadto sa Land Transportation Office (LTO). Niadtong Biyernes giatngan sa mga polis si Bartido diha sa karsada diin moagi ang iyang rota apan wala kini mopatim-aw.

Ang kapolisan nakadawat og impormasyon kabahin sa nahimutangan ni Bartido ug dihang ilang giadto naatlan nila kining nakig-inom uban sa mga higala diha sa barangay Inayagan, Minglanilla.

Matud ni Biñas nga dihang ilahang gipakita ngadto sa nakasaksi sa hitabo si Bartido positibo dayon kining gitumbok nga maoy nagmaneho sa motorsiklo.

Si Biñas midugang nga nagdumili si Bartido pagtug-an sa pangalan sa iyang kauban. (Brenda Batuto)   (BANATNEWS)