CEBU, Philippines - Dili maayong instalasyon sa kuryente ang gidudahan sa kabomberohan nga maoy hinungdan sa pagkaugdaw sa usa ka karaang balay sulod sa Adulfo compound didto sa sitio Pilit, barangay Cabancalan, dakbayan sa Mandaue sa alas 4:24 ang takna kagahapon sa kaadlawon.
Si FO3 Cifriano Codilla, imbestigador sa Bureau of Fire Protection sa dakbayan sa Mandaue nga nahinabi sa Banat News miila sa tag-iya sa balay nga nasunog nga mao si Heraclio Adulfo nga nagpuyo usab sa maong dapit.
Matud pa ni FO3 Codilla nga nagsugod ang sunog sa ikaduhang andana sa maong balay nga ginama sa gaan nga materyales ug dali kaayong nakaugdaw niini.
Matud pa ni FO3 Codilla nga may katahap sila nga faulty electrical wiring ang sinugdanan sa maong sunog.
Hinuon maayo nalang kay nakontrolar dayon sa kabomberohan ang maong sunog sulod lamang sa 2 minutos kay naugdaw man usab dayon ang tibuok balay.
Gibanabana nga mikabat og P70,000 ang katibuk-ang kadaot sa maong sunog ug walay kinabuhing naangin. - Romeo T. Limpangog ug Bong Soriano (BANAT NEWS)