CEBU, Philippines - Kritikal ang kahimtang sa usa ka 17-anyos nga lalaki human kini gipusil sa tawong nagmotorsiklo nga iyang gikasugat didto sa bukirang bahin sa sitio Malacoro, barangay Usmad, lungsod sa Argao niadtong Lunes sa alas 5:10 sa hapon.
Ang nasamdan sa bukobuko mao si Raymund Igos, 17, ulitawo ug molupyo sa barangay Lamacan, sa samang lungsod. Samtang ang namusil wala pa matumbok sa kapolisan sa paghimo ning balita.
Matud ni PO2 Bernie Lao sa Argao Police Station sa dihang nahinabi sa Banat News nga ang biktima nagsakay sa iyang motorsiklo gikan sa pinuy-anan niini ug pag-abot sa sitio Malacoro mihunong kini ug niadtong higayona gikasugat niya ang lalaki nga nagmaneho og motorsiklo.
Apan sa walay daghang estorya kalit gipusil si Igos makaduha ka higayon ug maayong pagkaigo sa bukobuko niini samtang ang namusil nagdali sa pagsibat pahilayo sakay sa motorsiklo.
Ang mga molupyo sa lugar nga nakadungog sa butobuto sa armas nga nagpakisusi sa hitabo maoy mihatod ni Igos sa Isidro Kintanar Hospital sa lungsod apan tungod sa seryoso nga kahimtang gibalhin kini sa tambalanan dinhi sa dakbayan sa Sugbo.
Ang kapolisan padayon pa nga nag-ila sa namusil ug gisubay ang posibleng kalambigitan sa fraternity war sa lungsod ang maong hitabo. - Darrel A. Carumba (BANAT NEWS)