Reklamo sa MCTOA susihon sa Ombudsman

CEBU, Philippines - Ang Ombudsman Visayas mosusi sa reklamo sa Metro Cebu Taxi Operators Association kon MCTOA batok sa regional director sa Land Transportation Franchising and Regulatory Board LTFRB-7 nga si Director Romulo Bernaldez kabahin sa nagkadaghang taxi units dinhi ug ‘nakakwarta’ ang naulahi niini.

Matud pa ni Assistant Ombudsman Virginia Palanca Santiago sa interview sa DyRF nga may mga graft investigators siyang palihukon aron susihon ang kamatuuran sa reklamo sa mga miyembro sa MCTOA nga gipangulohan sa ilang presidente nga si Richard Cabucos.

Si Cabucos miakusar ni Bernaldez nga wala motuman sa gipagawas nga moratorium sa LTFRB niadtong tuig 2000 nga wala nay mga madugang sa kapin sa 5 mil ka mga taxi units nga nagdagan dinhi sa Metro Cebu Area kay mosamot og kagamay ang kitaon sa mga taxi driver ug maalkanse usab ang mga operators.

Dugang alegasyon ni Cabucos nga gawas sa pag-isyu og laing prangkisa, ang regional director sa LTFRB-7 namaligya pa gyud niini sa kantidad nga P120 mil matag usa bisan og P10 mil lamang ang regular nga bayad niini.

Apan si Bernaldez sa linaing interview sa DyRF daan nang mihimakak sa mga alegasyon.

Matud pa ni Bernaldez nga P10 mil lang gyud ang bayad sa matag prangkisa sa 200 ka mga taxi unit nga giisyu sa iyang buhatan ug ang giingong pagpagawas og prangkisa gibase niya kini sa paglibkas sa moratorium niadtong tuig 2004 nga diin ang expired ug giabandonar na nga mga prangkisa sa taxi mao ray gibaligya.

Si Santiago sa iyang bahin miingon nga dunay lawom nga imbestigasyong mahitabo kabahin niini human ang ilang buhatan nakadawat na og pormal nga reklamo gikan sa mga miyembro sa MCTOA niadto pang tuig 2008. (BANATNEWS)