Tarpulina ni Salimbangon gipanglangkat

CEBU, Philippines - Ang kampo ni Kongresista Benhur Salimbangon sa 4th district mipasangil nga gipanglangkat sa ilang kaatbang ang mga tarpulina niini sa lungsod sa San Remigio.

Usa ka Daphnie Salimbangon, sa kampo sa mga Salimbangon mi-report sa San Remigio police station mipasangil nga gipangtangtang ang mga tarpulina sa duha ka higayon.

Sumala pa ni PO2 Dcardito Pacinio sa San Remigio Police Station nga gipasanginlan ni Salimbangon ang kampo ni Mayor Junie Martinez, mayor sa Bogo nga maoy nanangtang niini ug miila sa duha ka suporter sa mga Martinez nga maoy mihimo niini nga sila si Dario Misa ug Junior Tadula.

Si Daphnie mitug-an ngadto sa kapulisan nga nagsugod ang pagtangtang niadtong Enero 21 sa buntag ug gisundan niadtong Pebrero 6 sa hapon didto sa pantalan sa Hagnaya.

Sila si Mayor Celestino ‘Junie’ Martinez miangkong sila ang nagpatangtang tungod kay ‘misleading’ ang gihimo sa mga Salimbangon. Si Martinez kinsa nanawag ngadto kang Senior Supt. Erson Digal mitug-an nga dili na congressman si Salimbangon kondili ang iya nang anak nga si Celestino “Tining” Martinez III.

Si Tining maoy midaog sa piniliay niadtong 2007 base sa resolution sa Korte Suprema human sila miduso og protesta, apan hangtud karon wala pa gihapon makalingkod diha sa Plenaryo sa Kongreso.

Subay niini, si Digal mimando sa iyang mga sakop nga di magpadala sa mga hangyo sa mga politiko nga panangtangon ang mga tarpulina gumikan kay bugtong ang Commission on Elections ra ang adunay gahom pagtangtang niining mga tarpulina. (BANATNEWS)