Retiradong Coast guard nakuhaan og armas

CEBU, Philippines - Nagtingkagol sa detention cell ang usa ka retiradong sakop sa Philippine Coast Guard human kini gireklamo sa iyang kapuyo ug mga silingan sa sitio Quasi barangay Poblacion lungsod sa Tabuelan nga pagpanghagis ug pagdala-dala og armas nunot sa pagpatuman sa gun ban.

Ang gidakop mao si Percivgal Aranez Sirag, 54, nagpuyo sa maong lugar ug retiradong sakop sa Philippine Coast guard.

Subay sa imbestigasyon sa kapulisan sa Tabuelan, ang kapuyo niini nga si Erlinda Sabo, 48, maoy midangop ug mireklamo sa kapulisan nga pwerte niining huboga ug nanghagis.

Gikatahong gipangguba niini ang ilang mga kabtangan hinungdan nga natugaw usab ang ilang mga silingan ug nasigpatang duna kini gitak-ing armas diha sa hawak.

Tungod sa kahadlok mitawag sila sa kapolisan hinungdan sa pagkasikop niini.

Nasakmit gikan sa posesyon niini ang .9 mm caliber pistol ug usa ka magazine nga dunay sulod nga 13 ka buhing bala.

Atol sa gihimong imbistigasyon nakapakita og mga dokumento ang suspek nga dunay lisensiya ang mao niyang armas apan gibilanggo gihapon kini tungod sa iyang kalapasan sa gun ban nunot sa nagsingabot nga eleksyon ug gikatakdang pasakaan og kaso karung buntag sa kalapasan sa Comelec resolution no. 7414 Sec. of R. A. 7166 kon gun ban. – BANAT NEWS