Gwen andam moatubang sa kaso ni Sanchez

CEBU, Philippines - Gipalanog pag-usab ni Gobernador Gwendolyn Garcia nga andam siyang moatubang sa kasong usurpation of power nga isang-at ni Bise Gobernador Gregorio Sanchez tungod sa pagkuha sa iyang katungod sa pag-renew sa mga casual ug contractual employees sa Sangguniang Panlalawigan.

Si Garcia subling mipasabot nga anaa sa Local Government Code nga ang gobernadora maoy adunay gahum pag-hire og mga casual, contractual ug ubang klaseng mga kawani sa kagamhanan sa lalawigan bisan sa mga empleyado sa hunta probinsiyal.

Iyang gitataw nga sigon sa balaod, ang function o trabaho ni Sanchez mao ang pag-preside sa provincial board ug pagpirma sa operation fund alang sa provincial board. Ang gobernadora mihagit kang Sanchez pagdagan una pagka-gobernador aron makaangkon sa gahum pag-hire og mga empleyado.

Samtang ang tigpamaba sa Kapitolyo nga si Atty. Rory Jon Sepulveda nagkanayon nga ila gyud nga ipadayon ang pagpasaka og kaso batok kang Sanchez tungod sa pagpatrabaho sa mga kawani sa Kapitolyo ngadto sa iyang pribadong uma sa lungsod sa Tuburan.

Matud pa niini nga ang buhatan sa gobernadora nakahipos og mga ebidensiya ug mga testigos, walay labot sa mga napatik sa pamantalaan kalabot sa kalapasan sa bise gobernador.

Dugang pa niini nga ang buhatan ni Provincial Attorney Mariano Martinquilla maoy naghikay sa tanang mga dokumento aron mapasaka ang maong kaso batok kang Sanchez ngadto sa korte. – BANAT NEWS