GIDAKDAKA'G BATO TIPI

CEBU, Philippines - Napisat ang ulo sa usa ka mananagat human kini gidakdakan og dakung bato sa gikainom niining mananagat human sa ilang panaglalis dihang nangahubog na diha sa sitio Cambagyohun barangay Madridejos lungsod sa Alegria niadtong Domingo sa alas 5:00 sa hapon. Ang biktima mao si Cornelio Luardo Letigio, 54, molupyo sa maong lugar samtang ang suspek mao ra usab ang iyang kaubang mananagat nga si Ponciano Lerio alyas Dokdok, 48, nagpuyo gihapon sa maong dapit.

Matod ni PO3 Leopoldo Tagalog, imbestigador sa Alegria Police dihang nahinabi sa Banat News ang biktima ug suspek nakit-an pa sa ilang mga silingan nga nag-inom gawas sa pinuy-anan sa biktima gikan pa sa pagkagabii hangtud sa pagkabuntag.

Ang asawa sa biktima nga si Juanita Letigio maoy nakadiskubre sa biktima sa iyang pagmata nianang sayo sa buntag nga nag-ubo na kini ug wala nay panimuot.

Apan dihang iyang gisusi wala na kini kinabuhi ug napislat na ang ulo niini, tupad sa biktima ang dakung bato nga nagkadugo nga maoy gituuhang gigamit pagdakdak sa ulo sa namatay.

Ang mga kabanay sa biktima daling nanawag sa kapolisan hinungdan sa gihimong hot pursuit operation base usab sa dili mo-menus duha ka saksing positibong mitumbok kang Lerio nga maoy responsable sa krimen hinungdan sa pagkasikop niini.

Hinuon ang suspek padayong nanghimakak sa kalambigitan sa maong krimen. Matud ni PO3 Tagalog kasong murder ang ipasaka nila batok sa suspek karung buntag.