CEBU, Philippines - Mihatag na og advance payment nga P25 milyones ang SM City Cebu sa ilang buluhisan niining tuiga ngadto sa kagamhanan sa dakbayan sa Sugbu sumala pa ni City Treasurer Ofelia Oliva.
Dugang P25 milyones ang ibayad sa SM sa sunod semana alang na sa kinatibuk-ang real property tax, business tax, ug amusement tax sa SM alang niining tuiga.
Gihatag sa SM ang advance payment sa buhis niini human usab mapirmahe ang kasabutan tali sa kagamhanan sa dakbayan ug sa maong establisamento.
Base sa kasabutan, ang buhis gamiton lang sa siyudad pagpapahawa sa mga informal settlers duol sa SM ug sa uban pang mga improvement sama sa pagpaayo sa nangadaot nga traffic lights, pagbutang og bag-ong mga traffic sign diha palibot sa nahisgutang balay patigayon.
Kahinumduman nga ang SM Prime Holdings nga maoy tag-iya sa SM City Cebu bag-o lang mihatag og P677 milyones ngadto sa kagamhanan sa dakbayan.
Kini isip pasiunang bayad sa ilang pagpalit og 30 ka ektaryang luna diha sa South Road Properties (SRP) nga mokantidad og P2.7 bilyones.
Sa pikas bahin, wala ikabalaka ni Oliva ang kasong sibil nga gipasaka sa usa ka insurance firm ngadto sa korte batok sa ilang buhatan.
Ang Philippine AXA Life Insurance Corporation misang-at sa kaso aron pagdemanda og tax refund nga mokapin sa P4 milyones tungod sa pagtoo sa nahisgutang insurance firm nga nanobra ang ilang gibayad nga buhis ngadto sa kagamhanan sa dakbayan.
Apan gitataw sa City Treasurer nga andam mohatag og tax refund ang dakbayan pinaagi sa tax credit kung dunay kamatuuran ang giinsister sa insurance company. – BANAT NEWS