Pagpanaktak og kawani maoy anggulong gisusi pagbanhig sa negosyante

CEBU, Philippines - Ang kapolisan sa dakbayan sa Talisay mibutyag nga duna na sila'y tawong gidudahang maoy suspek sa pagpusil patay sa usa ka negosyante niadtong Huwebes sa kaadlawon diha sa sitio San Rafael sa nahisgutang siyudad.

Si Supt. Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga ilaha nang gisusi ang maong tawo nga maoy gidudahang mipusil patay kang Leonidis Yap Arrival.

Ang anggulong pagpanaktak sa iyang mga trabahante sa biktima maoy gitutukan karon sa kapolisan gumikan kay giingong base sa nakuha nilang impormasyon dili magpanuko og taktak og trabahante si Arrival kun masipyat o may kahiwiang gihimo ang mga sakop.

Gibutyag ni Biñas nga matag petsa 8, 18 ug 28 kada buwan si Arrival moanha gyud kini sa iyang garahian sa sitio San Rafael aron magpalina sa iyang mga sakyanan.

Niadtong pagka Enero 18, 2010 dihang mianha si Arrival sa iyang garahian usa sa iyang mga kawani ang mipahimangno kaniyang dili na lang siya paanhaon tungod kay duna kini nadunggang may hulga sa kinabuhi ang iyang amo.

Kahinumduman nga si Arrival gipusil sa usa ka wala mailhing lalaking nagpasalipod sa usa ka kawayang koral samtang ang biktima nagmaneho sa Nissan Patrol niini gikan sa iyang garahian.

Si Arrival naigo sa aping ug gidala ngadto sa Cebu City Medical Center sa iyang mga kawaning misakay sa iyang sakyanan nga sila si Christopher Yu, Ricardo Lucero ug Junabel Tangaro, apan namatay kini human mabalhin sa usa ka pribadong tambalanan. – BANAT NEWS