Kanhi Deputy Cmdr. sa MBEAB nakalas sa crash

CEBU, Philippines - Kanhi base commander sa Mactan Benito Ebuen Air Base nga si Maj. Gen. Mario Butch Lacson maoy usa sa siyam nga nakalas sa pagkahagsa sa usa ka Philippine Air Force Nomad Plane diha sa kabalayan sa Cotabato City kagahapon sa udto.

Sa report sa ABS-CBN News, ang maong abyon sumala pa sa tigpamaba sa PAF nga si Lt. Col. Gerry Zamudio padulong sa Zamboanga City ang maong abyon niadtong tungura apan nahagsa kini alas 11:37 sa buntag.

Si Maj. Gen. Lacson maoy kanhi deputy commander sa MBEAB niadtong tuig 2007 hangtud 2008 ug mao nay kasamtangang commander sa PAF 3rd Air Division nga nagbase sa Edwin Andrews Air Force base sa Zamboanga City.

Sa report usab sa GMA News.Tv. kauban ni Lacson sa maong biyahe ang iyang aide nga giila lang sa pangalang Maj. Tacudoy, Capt. Ordoneo; 1st Lt. Valdez, ang babayeng pilot; 1st Lt. Lepae; Sgt. Lemara; Sgt. Mejia; ug Sgt. Gosum base sa pamahayag ni Cotabato City police chief, Sr. Supt. Willie Dangane, duna pay duha ka sibilyang giingong nakalas ug duha ka balay nga naugdaw.

Matud pa ni PAF Brig. Gen. Edgardo Mendoza ang 560th Air Base Wing Commander sa Mactan Benito Ebuen Air Base sa dakbayan sa Lapulapu si Lacson ug mga kaubanan gikan sa dakbayan sa Davao alang sa command conference ni Lt. Gen. Reynaldo Ferrer, ang Commander sa East Mindanao Command.

Gikan sa Davao mihapit sila luwan sa maong abyon sa Cotabato aron ihatud ang ubang opisyal, apan atol sa paglupad kalit nga nakasinati kini og engine trouble base sa pamahayag sa Civil Aviation Authority nga si deputy director Ed Kapunan.

Gikatahong ang piloto mi-request pa nga mobalik sa Cotabato ug gihatagan na og landing clearance ug dihang mitubag sa radio naputol-putol na kini ug nawagtang sa kahanginan.

Si Lacson maoy usa sa nangusog nga mahatag ang tanang benipisyo sa pamilyang nawad-an sa ilang mga minahal sa kinabuhi sa dihang pito sa mga sakop sa PAF luwan sa C-130 nahagsa didto sa Davao sa milabay’ng Agusto 25, 2008. – BANAT NEWS