CEBU, Philippines - Napusilan patay sa mga polis sa Balamban Police Station ang usa ka mag-uuma human kini namusil aron labanan ang iyang igsuon nga giserbehan og warrant of arrest tungod sa kasong pagpananom og marijuana.
Nahitabo kini sa sitio Lantawan, barangay Matun-og, lungsod sa Balamban niadtong Martes sa alas 10:30 sa buntag.
Ang napatay sa kapolisan mao si Rolito Abanto, 43, minyo ug molupyo sa sitio Cabatbatan, barangay Bayong sa maong lungsod ug usa ka mag-uuma.
Matud ni PO3 Eugene Macapas sa Balamban Police Station sa dihang nahinabi sa Banat News nga ang igsuon sa biktima nga si Jelly Abanto maoy gipangita sa kapolisan tungod kay mao kini ang subject sa warrant of arrest.
Ang kapolisan nga pinangulohan ni SPO3 Allan Patalingjug maoy mi-serve sa warrant.
Si Toledo City RTC branch 29 Judge Cesar Estrera maoy miluwat sa warrant of arrest batok kang Jelly tungod sa kasong pagpananom og marijuana.
Apan sa dihang miabot ang grupo ni SPO3 Allan Patalingjug sa maong lugar, si Rolito mibabag sa kapolisan ug namusil gamit ang kalibre .45 nga pistola. Ang iyang igsuon nga si Jelly armado usab niadtong tungora apan wala makaporma.
Matud pa napugos ang kapolisan pagbalos og pusil sa magsuon hinungdan nga maayong pagkaigo sa lawas niini, samtang si Jelly nakahigayon sa pag-eskapo pahilayo.
Wala na madala pa sa tambalanan si Rolito ug nabugtoan gyud kini sa kinabuhi. Nakuha gikan sa iyang kamot ang kalibre .45 nga pistola nga dunay usa ka bala nga miungot sa barrel niini.
Padayon pang gipangita sa kapolisan si Jelly nga subject sa warrant nga nakasibat atol sa pinusilay sa iyang igsuon ug sa kapolisan.Gitumbok sa kapolisan ang bukirang lugar sa Balamban nga maoy daghan og plantasyon sa marijuana. – BANAT NEWS