Sidewalk vendors abugon sa Speed

CEBU, Philippines - Pahawanan ni Mayor Tomas Osmeña gikan sa mga manindahay ang kadalanan sa dakbayan nga pabiling gihugpaan sa mga sidewalk vendors sumala pa sa hepe sa Squatters Prevention Encroachment and Elimination Division (SPEED) nga si Vicente Mercado.

Matud ni Mercado nga ang mando giluwatan ni Osmeña sa wala pa kini mogikan ngadto sa Estados Unidos niadtong miaging semana alang sa ikatulo niining quarterly medical checkup human sa malampusong operasyon sa iyang pantog.

Miingon si Mercado nga partikular nga mga dalan nga pahawanan mao ang P. Lopez, Natalio Bacalso Avenue, ug ang ubang sidewalk nga dili na kaagian sa pedestrians.

“Basta maoy giingon niya nga ang sidewalk nga dili na kaagian sa tawo unya adto na sa dalan muagi, limpyuhan gyud na siya,” sumala ni Mercado.

Nagkanayon ang hepe sa SPEED nga karong adlawa, laing clearing operation na usab ang ilang ipahigayon sa kadalanan sa dakbayan, subay niini subling gipasidan-an ni Mercado ang mga sidewalk vendors nga siguruhon lang niini nga dili makabalda sa pedestrians.

Kini tungod kay ang mga sakop sa SPEED giingong dili magduha-duha pagsakmit sa mga paninda niini lakip na sa mga pushcart ug mga stalls.

Nasayran gikan kang Mercado nga misaka na usab ang multa alang sa paglukat niadtong mga baligya ug pushcart nga ilang masakmit.

“P350 ra man to, karon gi-amend man ang balaud nahimo nang P500, so, dili gyud sila magpalabi og pabadlong aron dili nato arsahon ilang baligya,” matud ni Mercado. Gawas sa ilang ipahigayong clearing operations midugang si Mercado nga ila usab nga ipatuman ang mga demolition order nga nadawat sa ilang buhatan. (BANATNEWS)