Taga Tabuelan nangadoy'g hospital

CEBU, Philippines - Gipangandoy sa mga molupyo sa lungsod sa Tabuelan nga makabaton sila og kaugalingong district hospital sa ilang lugar aron dili na sila mahasol pagbiyahe og layo kun adunay masakiton sa ilang lugar.

Gipalanog kini sa nanagpanon nga gatusan ka mga molupyo sa maong lungsod nga sagad taga bukid sa pagpakigtagbo kang Welma “Beb's” Zamora nga kandidato sa pagka –bise mayor sa maong lungsod ubos sa Liberal Party (LP) ug mihangyo nga unta tabangan sila nga matuman ang ilang pangandoy ilabina kun modaug sa pagka- presidente si LP Presidential Candidate Benigno Noynoy Aquino III.

Si Zamora nga nahinabi sa Banat News nagkanayon nga iya gayud unta kining ipadangat kang Senador Noynoy Aquino atol sa gipahigayong caravan niini didto sa lungsod sa Tuburan niadtong Sabado apan tungod sa ka bise sa senador wala siya makahigayon sa pakighinabi sa senador.

Giangkon ni Zamora nga sa pagkakaron problema gyud kaayo sa ilang lungsod ang tambalanan tungod kay kun may masakiton adto pa nila ihatod sa Tuburan o kaha ideretso sa dakbayan sa Sugbo.

Gipadayag ni Zamora nga pagkakaron wala gyud kaayoy kapuslanan ang klinika sa ilang lungsod tungod kay kadto rang mga pasyente nga magpabakona maoy dawaton niini.

Matud ni Zamora nga iyang paningkamotan ilabina kun modaug si Sen. Aquino sa pagka- presidente ug siya mahimo usab nga bise mayor sa Tabuelan nga matubag ang maong yangungo sa mga molupyo sa ilang lugar.

Gawas niini gusto usab ni Zamora nga kahatagan og daghang kahimanan sa tambal ang klinika sa Tabuelan aron nga makapanambal kini sa mga moduol nga masakiton sa maong lugar.

Si Zamora naila na nga usa sa mga supporter sa pamilyang Gerona sa maong lungsod ug aktibo sa pagsuporta sa nagkalain- laing kalihukan sama sa pagpasiugda og mga sports activities, medical mission, ug uban pa.   (Darrel A. Carumba).    (BANATNEWS)