Cansaga-Paknaan Bridge gibuksan na ni Arroyo

CEBU, Philippines - Pormal nang gibuksan ni Presidente Gloria Macapagal Arroyo kagahapon sa buntag ang P2.6 bilyones nga taytayang nagdugtong sa barangay Paknaan sa dakbayan sa Mandaue paingon ngadto sa barangay Cansaga sa lungsod sa Consolacion.

Kini maoy unang gihimo sa presidente pag-abot niini kagahapon sa buntag una pa milahos kuyog ang iyang kabinete ug mga tag-as nga opisyal sa Sugbu ngadto na sa lubong sa mitaliwang si Press Secretary Cerge Remonde.

Si Arroyo gisugat nila ni Gobernador Gwendolyn Garcia, Kongresista Nerissa Soon-Ruiz, Mayor Jonas Cortes, Mayor Arturo Radaza sa Lapulapu City, Mayor Avelino Gungob sa Consolacion, Mayor Vincent Frasco sa Liloan, DPWH secretary Victor Domingo ug 5th district representative Ramon Durano VI ug uban pang mga opisyal sa tugpahanan sa Mactan Cebu International Airport ug milahos sa maong proyekto.

Kahinumduman nga hastang sukoa sa pangulo human sa iyang pagbisita niadtong milabay'ng tuig pipila ka bulan human kini masugdi dihang wala kini matagbaw sa gipaspason sa pagtrabaho ug mimando kang Department of Public Works and Highways kanhi secretary Hermogenes Ebdane nga dalion ang paghuman niini.

Sumala pa sa report sa Philippine Information Agency, si Engr. Nilo Pamaylaon, ang DPWH-7 project director mibutyag nga ang Cansaga Bay Bridge project sa Pakna-an, Mandaue City maoy usa sa mga labing dakong infrastructure projects sa administrasyong Arroyo dinhi sa Metro Cebu.

Kini naglakip sa taytayan gikan sa Cansaga Bay ug duha ka dagkong dalan nga may kinatibuk-ang gitas-on nga 1,250.651 metros.

“It is the last remaining road link that will complete the arterial bypass from the southern district of Talisay City, to the central district of Cebu and Mandaue Cities up to the northern district of Consolacion, Liloan, Compostela and Danao City,” sumala pa niini sa PIA.

Gipanglantawang mao kini ang sulbad sa nagtipun-og nga trapiko sa karaang dalan nga nagkonektar sa Consolacion ug Mandaue ug mamahimong magamit sa mga kalihukang agricultural, industrial, panagatan, commercial ug turismo sa Metro Cebu. – BANAT NEWS