CEBU, Philippines - Manghatag og cash reward ang kagamhanan sa dakbayan sa Sugbu atol sa ika-73 nga charter day celebration niini karong sunod buwan sumala pa ni Mayor Tomas Osmeña tungod kay gihulagway niini ang maong okasyon nga labing dako sa kasaysayan sa kasaulugan.
Lakip sa hatagan og pasidungog ug tunulan og cash reward sa mayor mao ang hepe sa tanod sa barangay Punta Princesa nga si Rene dela Cerna nga moabot sa P100 mil tungod sa giingong bayanihong gibuhat niini.
Si dela Cerna mitubag og alarma sa usa ka gang war diha sa ilang dapit ug napusilan na hinuon kini sa iyang pus-on niadtong milabay’ng tuig ug ang bala nag-ungot pa gihapon sa iyang pus-on tungod kay wala kini makuha atol sa operasyon.
Sa pikas bahin, lakip usab sa hataga’g pasidungog ug P50 mil nga cash reward ni Osmeña mao si Miss Cebu 2009 nga si Kris Tiffany Janson tungod usab sa giingong pagpakahilom niini dihang mibuto ang kontrobersiya sa nahisgutang beauty pageant.
Nahimong kontrobersyal ang Miss Cebu 2009 dihang si Janson maoy gitunulan sa Texters’ Choice Award ug dili ang tinuod nga mananaog niini nga si Kimberly Therese Burden.
Samtang P50 mil usab ang itunol ni Osmeña ngadto kang City Treasurer Ofelia Oliva, human usab makadayeg ang mayor sa taas nga koleksyon sa buhis sa siyudad.
Gipahibawo usab sa mayor nga iya nang giimbitar si Presidente Gloria Macapagal Arroyo nga motambong sa umaabot nga charter day sa dakbayan isip pinasidunggang dinapit.
Si Arroyo planong himuong “adopted daughter” sa kagamhanan sa dakbayan tungod usab sa giingong mga tabang nga gibubo niini sa siyudad. Plano usab ni Osmeña nga mopadangat sa iyang katapusang State of the City Address (SOCA) atol sa kasaulugan nga ipahigayon diha sa Cebu City Sports Center. (Elly Bolonos) (BANATNEWS)