6 presidentiables pulos nanaad sa Sugboanon

CEBU, Philippines - Unom ka mga nangambisyong mamahimong pangulo sa nasud pulos nanaad og kausaban ug kalamboan sa nasud ug milagda sa covenant sa ilang mga gipanaad kagahapon sa gihimong “Choices and Voices for 2010: An Encounter with the Presidentiables” sa Cebu International Convention Center.

Ang maong kalihukan gihimo sa mga miyembro sa Cebu Chamber of Commerce and Industry, Mandaue Chamber of Commerce and Industry ug Cebu Business Club aron paminawon ang mga baruganan ug tagsa-tagsa ka abilidad sa mga kandidato. Labing unang pangutana mao nga unsay naa kanilang mga presidentiables aron sila botaran sa mga Sugbuanon, hinuon pipila sa mga kandidato wala dayon makatuhop sa pangutana maong ang ilang tubag ‘general’ ra kaayo sama sa pagkamalambuon niini sa natad sa kultura, turismo ug uban pa.

Naglakip sa mga pangutana mao ang kabahin sa ekonomiya, kalikupan, edukasyon, kabataan, moralidad, pagpalambo sa negosyo aron makakumbate sa mga produkto sa mga langyaw, turismo, seguridad, kurapsyon ug uban pa. Ang mga nanambong nga mga standard bearers sa nagkadaiyang partido mao sila si Lakas-Kampi CMD candidate Gilberto ‘Gibo’ Teodoro, Nacionalista Party candidate Senador Manuel ‘Manny’ Villar, Liberal Party candidate Benigno ‘Noynoy’ Aquino, Pwersa ng Masang Pilipino candidate Joseph ‘Erap’ Estrada, Bangon Pilipinas Party candidate Bro. Eddie Villanueva, Bagumbayan Party candidate Richard ‘Dick’ Gordon.

Ang unom gihatagan og tag tulo ka minutos, 30-segundos ug usa ka minutong tagal aron tubagon ang mga pangutana sa nagkadaiyang sector.

Samtang ang ubang mga presidentiable nahutdan og oras pagtubag sa pangutana, ug ang uban nakatubag man apan wala matumong sa pangutana duna sad kanilay mga nakatubag gyud dayon ug natumbok ang gipangayo sa pangutana.

Lakip sa mga gipangutana mao ang kabahin sa grabeng kurapsyon sa mga nanglabay'ng administrasyon.

Si Villanueva sa iyang bahin mibutyag nga kinahanglang hingusgan ang mga korte ug iimplementar ang tinuoray nga transparency.

 Mao usab kini ang tubag ni Teodoro dugang sa pag-ingon nga kinahanglang pasidunggan ang mga empleyado sa gobiyernong nakahimo og maayo sa katawhan ug kinahanglang mamahimong aktibista ang publiko aron bantayan ang lihok sa pangulo.

Si Aquino sa iyang bahin miingon nga kinahanglang higpit nga iimplementar ang mga balaod batok sa kurapsyon. Si Estrada sa iyang bahin bisan wala direktang makatubag sa maong pangutana apan base sa tubag niini napadayag niyang wala siya’y giila bisan paman iyang asawa ug anak nga kaniadto iyang gipaimbestigar tungod sa kurapsyon apan napamatud-ang walay sala.

Si Estrada napalagpot sa pwesto ug nakombikto ug gipasaylo sa gobiyerno tungod sa kasong plunder pabiling mibarog nga wala siya mangawkaw ug tumo-tumo ra ang tanan batok kaniya. Si Villar sa iyang bahin nagkanayon nga ang usa ka pangulo kinahanglang molusad dayon og paspas nga mga programa sulod sa unang 100 ka adlaw sa paglingkod sa mapiling pangulo, transparency, pangusgan ang hudikatura ug estratehiya batok kurapsyon.

Sa tanan, si Gordon maoy bug-at og gitubag “I will not pardon anybody who is convicted of corruption,” butang nga nakapahugyaw sa mga mitambong nga kapin sa 2,000 ka mga tawo sa CICC.

Ang Sugbu maoy gikunsiderar sa uwahing eleksyon nga ‘crucial area’ tungod kay kini maoy nakapadaog kang Presidente Gloria Macapagal Arroyo, giisip usab kini sa mga kandidato nga dako unya og papel sa tagsa-tagsa nila ka kampanya alang sa pwesto.

Ang maong forum gituyo sa mga negosyante aron matino kun unsay ilang mga baruganan ug gipaabot nga pinaagi niini nakatabang ang maong tigum alang sa paggiya sa mga botante. (Edwin Ian Melecio ug Lesley Caminade)   (BANATNEWS)