Mga hepe sa kalungsoran gilahugay sa CPPO

CEBU, Philippines - Mga opisyal sa kapulisan sa lalawigan sa Sugbu gipaubos sa lahugay subay niining pagkatudlo usab sa ilang bag-ong pangulo nga si Sr. Supt. Erson Digal kinsa milingkod sa Cebu Provincial Police Office (CPPO) niadtong milabay’ng semana.

Base sa duha ka mga special order no# 8 ug no#16 ubay-ubay sa mga opisyal sa headquarters sa CPPO ug mga Chief of Police sa kalungsuran ang epektibong gipalagpot ug gipahulipan sa ilang posisyon nga gipetsahan niadtong Enero 9 ning buwana.

Ang pangulo sa kapulisan sa lalawigan sa Sugbu Sr. Supt. Digal nagkanayon nga kabahin kini sa pagpalambo sa serbisyo sa kapulisan ngadto sa publiko nga kadtong ubang mga opisyal mahataga’g kahigayonan sa paghupot og posisyon.

Ang mga opisyal nga gipanghulipan naglangkob nilang Supt. Larson Dechino, deputy provincial director for Administration sa CPPO, gibalhin isip (oic) sa kapulisan sa Probinsya sa Siquijor, mohulip niya sa pwesto mao si Supt. Eduardo Saavedra gikan sa Police Community Relation (PCR) sa CPPO.

Samtang si Supt. Romeo Perigo ang deputy provincial director for operations adto na idestino sa regional office isip deputy regional operations and plans division sa PRO-7 nga gibiyaan ni Sr. Supt. Louie Oppus; samtang si Supt. Tito Satera ang hepe sa Bogo City Police Station maoy mohulip kang Supt. Perigo.

Ang hepe sa Toledo City Police Station Supt. Julian Entoma ibalhin kini isip hepe sa Bogo City Police Station, si Supt. Teofilo Siclot Jr. sa Carcar City Police Station ibalhin isip hepe sa Toledo City, si Supt. Renato Malazarte sa Provincial Mobile Group (PMG) adto na sa Carcar.

Si Insp. Reyco Romaguera sa Provincial Intelligence Branch (PIB) ibalhin sa PMG, si Chief Insp. Eddie Recamara gikan sa Talisay Police Station gibalhin sa Liloan, si Sr. Insp. Ramon Ortiz ang hepe sa Liloan Police Station maoy gitudlong bag-ong deputy sa Danao Police Station.

 Si Insp. Camelo Gonzaga sa Provincial Security Service Group (PSSG) gibalhin sa Badian Police Station, si PO3 Eric Enad sa Pilar Isla sa Camotes gibalhin sa Talisay, si SPO1 Marcelo Cometa sa Madredijos gibalhin sa Bogo City, PO1 Danilo Talandron sa San Francisco, gibalhin sa Bogo.   (Guam Logroño)    (BANATNEWS)